【樂評】乘著Tjoe的爵士結他，一趟無負擔的倫敦旅程：《FLOW LONDON》

文：Chameleon

第一次認識Tjoe (讀Tee-Joe，好似係)，係零零年代佢擔任結他手嘅樂隊「PickPak掣」。樂隊明顯受廣東歌影響，但係整體嘅Soundscape並唔係普通「K歌」，無論係伴奏吉他定主音結他，都展現出好強嘅原創性。當時Tjoe 係比較技術型同實驗型嘅樂手，鍾意喺現場表演好playful咁加插一啲古怪嘅effects。

不過，當年PikPak掣用jazz加bossa nova形式玩pop，主音角色亦較重，Tjoe可能未必咁有發揮。直到差不多十年後，Tjoe響2014年喺香港錄咗《FLOW》EP，到2016年喺倫敦遊歷期間，同當地遇到嘅音樂人一齊合作錄咗《FLOW LONDON》，全碟十首歌更加focus喺instrumental，特別注重唔同樂器嘅交流。

《FLOW LONDON》第一首歌〈Walking In The Rain〉一嚟已經二話不說，拋個好似水流般暢順嘅旋律，好似呼應緊呢隻碟嘅名「FLOW」（流動）咁。通常行路落雨都已經好狼狽，但係Tjoe嘅呢首歌，好似好瀟灑咁享受落雨嘅街道。電結他同Fender Rhodes電子琴一齊彈奏句licks時就好似一對戀人係街上面跳舞咁，浪漫得來又唔造作。

成首歌有好大部份係即興演奏，響現代嘅錄音比較少見，因為好多時候就算係爵士專輯，都鍾意預先編好晒，就算有即興，都可能喺一分鐘內搞掂。Tjoe呢首歌就差唔多超過一半部分都係即興（仲有drum solo，好耐未試過聽studio album有drum solo），可見佢都想將現場演出嘅真實感帶俾聽眾。

〈The Music Never Stopped〉雖然基礎都係以爵士樂為主，但係其實同上一首〈Walking In The Rain〉一樣都非常易入口。從前奏簡約得嚟又對稱嘅旋律，可以睇得出Tjoe亦都係一個出色嘅melody writer。

不過呢首歌都聽得出佢駕馭到空心電結他（應該係）嘅獨特音色，每一個音都處理得輕盈之餘，亦都無犧牲到獨奏嘅活力。大碟上面嘅小號手都配合咗結他嗰種平實嘅感覺，只係運用咗極少嘅sliding同bending。去到首歌嘅後半部，bass solo將原有嘅節奏稍為輕輕打破，然後好小心翼翼咁將結他同小號建立嘅節奏重新整理一下，等首歌可以去返開頭嘅平靜，大團圓結局。

〈N5 To Edgware〉應該係取名自倫敦巴士N5去埃奇韋爾。呢首歌展現到Tjoe喺結他獨奏方面嘅活力，靈活流暢嘅技術顯示咗佢受Gypsy Jazz影響之餘，都展露咗佢調皮玩嘢嘅一面，中間不忘加插如〈Für Elise〉（給愛麗絲）等熟悉嘅旋律。不過筆者覺得歌曲後半段以合成器獨奏為完結好似有啲未完成嘅感覺，總係覺得首歌後半段可以有更強嘅dynamic change。

〈Four Seasons〉喺樂器運用上幾有驚喜，古古惑惑嘅bass前奏，加埋突如其來嘅小提琴之間嘅化學作用，好吸引聽眾幻想之後會發生嘅事。之後嘅結他獨奏反而變得頗斯文，仲以為會專登乘機玩弄觀眾嘅耳朵，倒亂原有嘅節奏添。

直到後段鼓手變成主導氣氛嘅角色，成首歌嘅力量慢慢推向高峰，小提琴同結他終於加入一齊幫手將首歌帶去混亂又陌生嘅領域，好似睇緊驚險嘅冒險小說嘅第一頁咁，突然間！首歌完咗，大家又回到寂靜嘅現實世界。

〈Miss Someone You Don’t Know〉作為呢隻EP嘅結尾歌真係好適合，亦都係筆者最鍾意嘅一首歌。好似中樂咁處理簡約嘅旋律，亦唔覺得矯揉造作，令筆者諗起香港另外一位爵士結他手崔展鴻的彈奏方法。小心翼翼嘅結他配上優雅嘅小提琴，彷彿為首歌帶黎一層飄飄然嘅霧氣一樣。而Bass solo就好似一段非語言嘅獨白，為呢隻5首歌嘅EP畫上句號。

如果你係一個平時都鍾意聽easy-listening嘅純音樂的話，Tjoe呢隻《FLOW LONDON》係好好嘅選擇。抽象嘅音符不時令觀眾幻想到唔同嘅景象；編曲方式比較似樂隊現場嘅做法，非常簡單直接，而旋律令人印象深刻，筆者甚至覺得，流行樂成份多過爵士樂。雖然專輯製作方面未能夠完全呈現Tjoe現場演奏嘅力量，但係就係咁，大家先要多啲去睇佢live呀嘛。