Hidden Agenda小食店開張！Serrini x 占士率先試食！

Hidden Agenda早前第三度被地政迫遷，透過眾人集資五十萬，最近終於搬到觀塘鴻圖道，並以小食店形式開張大吉。

HA餐牌選擇豐富，暫時最貴的食品只索價$38。早、午餐包括三文治、意粉、飯等主食。早前現身於HA活動又大獲好評的永記玉子燒亦在其中，共有原味、芝士、芥末、豆腐、紫菜芝士及蛋黃醬明太子口味。而甜食方面則有星球芝士蛋糕、新鮮果汁、乳酪Smoothie及奶昔，但要注意只設「立食」。

價錢適中之餘，手繪餐牌、Start From Zero主理的木工、Graphicairlines的塗鴉，還有Live Show海報牆，只拍照打卡的人已經可以起程。但既然以食物作招徠，當然要試試廚房實力。

Glass Onion特地請到識飲識食的音樂界人士：哭泣的聖母Serrini，以及新蒲崗景福街飲食達人占士@LoveDa Records，為大家身先士卒，率先試菜。

冰鎮秋葵＄30
Serrini：秋葵有啲好似鼻涕咁嘅……係阿和嘅口水。呢個秋葵超級健康！
James：好辣呀！原來秋葵上面啲綠色忌廉係芥辣……

芝士玉子燒（＄35）
James：呢個係…Tamagoyaki……他媽的Yuki。通常玉子得個滑字，呢個好有質感。
Serrini：我好鍾意整玉子嘅哥哥，佢個Instagram係設計得超靚，擺啲文青相，令玉子都好文青、好好味咁。
芥末玉子燒（＄35）
Serrini：佢唔會勁辣，因為啲芥辣同玉子溫柔嘅味道配合得好好。
James：原來真係辣架！！！

紅麻辣肥牛飯（$28）
Serrini：配菜有金菇，可能因為表面面積大，超級索汁，好麻辣。
James：咦，個牛肉真係幾好，個「紅麻辣」同「牛」係分開嘅，個牛肉冇咁配菜多麻辣味，冇蓋過牛肉味，但食飯又會撈埋一碟先食。佢用花椒應該有啲研究，份量剛剛好。學我朋友話齋，呢個有陣「撈」味……就係北方人叫南方人做「撈」，但有撈味得嚟唔油膩，連麻辣都可以唔油膩……

星球芝士蛋糕（柚子味）（$30）
Serrini：柚子味酸酸地，溝埋好濃郁芝士個texture，個甜味又比餅底中和返，我覺得幾好。

露西綠（＄38）
James：呢杯係…路姆西…唔係，係露西綠，有青蘋果、青瓜、西芹同羽衣甘藍。但咩係羽衣甘藍呢？
Serrini：「雨衣甘藍」就係落雨，要著雨衣，通常係黃色，但著藍衣就可以Stand out，係一種Fashion。好似話羽衣甘藍可以令消化好啲，所以好似灑聖水咁，乜野都落啲。

Hidden Agenda
地址：觀塘鴻圖道80號鴻圖工業大廈地下
營業時間：8am-3pm （試業期間）