疫情衝擊全球，香港人在動盪之際再添陰影，生活規律也重新習慣－－學生停課、在家工作、禁止聚集、無薪假……音樂活動也全面停擺。雖然音樂工作者多以零散自僱形式運作，但面對疫情，未必就有備而來。我們隔空訪問二人組合per se、樂隊金巴利道路真理生命的Teeda、詞人王樂儀，與民謠歌手黃衍仁，他們疫情期間生活與創作有哪些改變與感悟？聽著哪些音樂渡過這段日子？
per se
Q：疫情期間每日時間表？
Sandy：以前好多時都work from home，所以冇乜大改變。每日都做既係：冥想 / 練歌 / 食維他命C / YouTube。
Stephen：最大分別係冇晒騷，我都有教樂器同mixing工作，最初大家都唔知會點，有學生都會停，但逐漸返嚟，依家定期每星期都有上堂，所以第一個月嘅時間表影響最嚴重。
Q：這段期間有創作嗎？
Sandy：近來總是創作到一些走唔出框框既作品…所以大部分已經扔掉了🤣
Stephen：而家未夠Long term知道呢個情況點樣易響寫歌、想講嘅嘢。而家做的歌都係之前計劃好，要過多一反日子先知呢段日子點樣影響創作。
Q：疫情對工作的影響？
Sandy：教學上幸運地仍然保持到九成學生上堂，生計還是可以的。只是所有演出都put on hold，都幾掛住出show既感覺😤
Stephen：冇晒騷，就只剩返Routine工作，冇乜milestone同progress，所以stereo is the answer隻碟都係趁呢個時候做。set返啲目標比自己有向前的感覺。做完又即刻搵其他嘢做，好似per se未知幾時出都做住歌先，未做完第一首都開始下一首。因為剩返routine工作其實唔係好健康。財政方面，冇咗騷錢，但呢份收入本身都係好唔穩定。
Q：形容你當下的狀態？
Sandy：養精蓄銳，靜靜等候下一個演出機會。
Stephen：每樣事情都花多點時間，聽歌、做運動，甚至打機都是。
Q：這期間你最常聽的音樂？
Sandy：culenasm、FLOWER FLOWER、stereo is the answer
Stephen：多咗時間聽嘢，加上寫緊歌所以都想聽多啲歌。FLOWER FLOWER新碟《Target》、[Alexandros]前年的《Sleepless in Brooklyn》 、聽得最多係Bring Me the Horizon《amo》。
Teeda@金巴利道路真理生命
攝影：Lok. （照片由受訪者提供）
Q：這段期間有創作嗎？
有返工同freelance deadline 做時間表，其實同之前冇乜分別😂可以靜落嚟聽歌時間多左，乜都聽下咁。
Q：疫情期間每日時間表？
水咗一大班人極速錄好左新ep，好似一班fd街場踼波，男女老幼乜都有啲都幾歡樂。
Q：疫情對工作的影響？
演出展覽取消晒收入少咗都ok多，窮窮地咁。
Q：形容你當下的狀態？
ok la
Q：這期間你最常聽的音樂？
Absurd Trax AT15 Inhuman Spaces by Sour Gout
行雲流水嘅音樂，太有型。
Cenizas by Nicolas Jaar
Sound design 太勁，超勁現實系列。
purple moonlight pages by R.A.P. Ferreira
Milo新作，詩詞可以聽到愛呀呀呀
The weeknd – After hours
自Echo of Silence 之後嘅驚喜之作，909加Juno佢成個米高Jack神咁，好假肥仔都話有親切感。
Polyhymnia by Yazz Ahmed
UK jazz新秀，聲音组合阿拉伯加Dpsy味幾正，同埋啲 playing 好好。
黃衍仁
攝影：oneness zeng （受訪者提供）
Q：疫情期間每日時間表？
無乜特定嘅儀式，但每日早上會做八段錦或拉筋，有時會打吓坐。
Q：這段期間有創作嗎？
三月差不多每日都回劇場排戲，負責音樂和表演，好充實，也首次嘗試制作廣播劇，至今還未完成所有後制，基本上還有很多配樂要寫。個戲叫《聽搖滾的北京猿人2021》，2017首演，今次會有改寫，當然也受到社會運動的影響，故事牽涉三個年代，三個動蕩時代裡對變革的看法，對人類未來的想像。至於四月開始，接了一套電影的配樂工作，一切還在開始的階段，現在我的感覺是很掛念戲院，希望部戲可以喺戲睇到啦。
Q：疫情對工作的影響？
疫情令劇場演出廷期至六月，甚至也不肯定六月是否真的能夠上演。我這十多年一直是FreeLance工作，己習慣了無長遠計劃，但當想到不知疫情廷續到何時，還是有少少擔心的。不過這些真的微不足道，不重要的。重要的是時刻警醒，不受恐懼迷惑。
Q：形容你當下的狀態？
當下就是要提醒自己不要太認真看待這世界之夢，但非也虛無。好好跟耶穌和佛陀學習。
Q：這期間你最常聽的音樂？
早陣子聽得最多的是這張[Negro Prison Blues And Songs by Alan Lomax]。而且還sample了它的beat用在聽搖滾的北京猿人主題曲。
王樂儀
照片由受訪者提供
>Q：疫情期間每日時間表？
通常七、八點起身。雖然鬧鐘係六點，但天氣太潮濕起唔到身（笑）。起身第一件事餵貓，食早餐，成個朝早到中午一、兩點，都係處理緊學校工作，因為本身是大學兼職講師，要回覆學生、行政工作之類。每星期有三天教書，加上要Zoom，準備工作更加難。創作通常在晚上進行，或者特登騰出早上和晚間來做。下午通常做些不需要太集中的工作，因為比較睏。
Q：這段期間有創作嗎？
幸運地都多創作，手頭上有兩首王嘉儀的歌，國語碟的廣東話作品，以及一隻玩吓的rap，和替另一位創作歌手做新碟，關於家庭當中難以解釋、脫離，再變成自己的過程。
多了時間在家－－一個私密的空間，所以都較容易代入構思到題材，已經寫了第一首，自己很滿意，頗嘔心瀝血，敬請期待。
近來的創作也包括我的博士論文。笑。
Q：疫情對工作的影響？
工作模式影響很大，因為我以為自己係靠樣的講師（笑），但原來唔係，怎樣都要有presence，面對面同學生交流。變成網上之後好sad，因為好耐冇見過佢地，我亦唔習慣對住電腦講嘢。生計很幸運地冇，因為詞人點都要有份穩定工作。
Q：形容你當下的狀態？
我裡面有種……躁動的東西，因為我不是呼天搶地的人，所以表面上都維持住正雪常常，好productive好積極。但畢竟不論運動還是疫症都很traumatise。另外是我們作為生還者，係咪有一定程度的內疚和無助呢？
近來外在努力維持一定程度的productive 和積極。不過內在比較混亂，始終在這城市之中，經歷運動與疫症，大部分人的生活天翻地覆，迷失似乎也是正常。而其他事事非非、紛爭都似漣漪一樣發生，使人無法不質疑何謂生活，如何生活。我們可以多醜惡，同時可以多接近，善。
一直在想生活與生存的關係。可能好kliche。一直都以為生活重要過生存。然而，這段時期，發現生活原來比生存容易，生活是向光的，建立自己的美好生活。但，生存是基本的，甚麼都沒有；但現在，我們維持生存。
Q：這期間你最常聽的音樂？
可能是歌手：張國榮、M83、Daniel Hart 做的電影soundtrack；還有魏如萱的〈恐慌症〉。太累的時候狂loop 韋禮安的〈貓咪共和國〉。
glassonionhk.com 